वंदनीय श्री तुकडोजी महाराजांचा जन्म अमरावती जिल्ह्यातील यावली गावात 30 एप्रिल 1909 रोजी झाला. अगदी बाल वयापासूनच त्यांना ईश्वर भक्तीचे वेड होते. सर्वसामान्यांची राष्ट्राप्रती उदासिनता पाहुन त्यांची ईश्वर भक्ती राष्ट्रभक्तीकडे वळली. ग्रामस्थानाच्या विधायक कार्याकडे विशेषत्वाने त्यांनी लक्ष घातले. 1942 च्या चलेजाव आंदोलनात महाराजांची भूमिका राष्ट्र नेत्याची होती. त्यादरम्यान त्यांना कारावास देखील भोगावा लागला.
भारतीय स्वातंत्र्यानंतर गावागावातील अंधश्रद्धा, जाति भेद, धर्मभेद समुळ नष्ट होऊन, गावाच्या उन्नतीसाठी, राज्यात सुराज्य निर्मीतीकरिता ग्रामगीता या ग्रंथाची रचना करुन त्यांनी आदर्श जीवनाचा पाया घातला.
राष्ट्रसंतांनी आपल्या आयुष्याचा क्षणोक्षण राष्ट्रनिर्माणासाठी वेचला. खंजिरी भजन त्यांचे समाज प्रबोधनाचे साधन होते. त्यांचे गद्य पद्य वाङ्मय समाजाला आजही दिशा दाखविण्यास समर्थ आहे.
अध्यात्म आणी विज्ञानची अनोखी सांगड घातल्यामुळे भारताचे पहिले राष्ट्रपती डॉक्टर राजेंद्र प्रसाद यांनी महाराजांना राष्ट्रसंत उपाधीने गौरविले. त्यांनी स्थापन केलेल्या मोझरी येथील गुरुकुंज आश्रमात 11 ऑक्टोंबर 1968 रोजी राष्ट्रसंतांचे महानिर्वाण झाले. वाड्मयीन सेवा व त्यांची समाधी समस्त मानवजातीसाठी प्रेरणास्थानी आहे.